Bichi di Kurason

Bichi di kurason (Dirofilaria immitis) ta un parásito (por bira 30 cm di largura) ku ta huza sangura pa e por infektá un otro kachó. Ora un kachó ku ta infektá ku bichi di kurason, e ta pika e kachó i pasa e larva (microfilaria). E larvanan aki ta sirkulá den e sanger di e kachó, rond su kurpa, pa ora un sangura chupa sanger di e kachó infektá, e tambe por wòrdu chupá. Aki e larva ta keda den e sangura pa mas o ménos 10- 17 dia i ta desaroyá te ora e larva bira infeksioso. Despues e larva (microfilaria) aki por infektá otro kachó ora e sangura bai chupa sanger. Ora e larva drenta, e ta bai sigui desaroya bou di e kachó su kueru pa 2-3 luna. Despues e larva yòn aki ta transladá via ader pa e kurason. Den e kurason i den e bog di aorta e larva yòn nan ta bai sigui desaroyá te ora nan bira adulto (4 pa 6 luna) pa despues nan produsí larva (microfilaria) di nobo. E larva nan aki ta keda sirkulá den e sanger di e kachó te ora nan wòrdu chupá bèk dor di un sangura.

Un bichi di kurason por sobrebibí 7 aña largu.

Síntomá serka kachó ku ta infektá ku bichi di kurason
Ora e bichi di kurason bira adulto, bo ta kuminsa mira e síntomanan. Esaki por kuminsá entre 5 pa 7 luna ku e kachó ta infektá. Motibu di esaki ta ku e bichi nan aki ta bai sinta den e aorta di e kurason banda drechi, kual ta stroba e sirkulashon di sanger. Mas tantu bichi tin, mas nan ta stroba e sirkulashon di sanger. Aki ta kousa ku e druk di sanger di e pulmon nan ta subi. Ora e druk di e pulmonnan hisa, e vògt ta sali for di e ardu i ta bai resultá den e tehido di pulmon i den e trakto respiratorio. Esaki por kousa ku e kurason ta bira swak, i ku ta kousa ku un parti di e pulmon no ta bai funshoná (longoedeem). Aki bo ta mira ku e kachó ta bai kansa hopi lihé i rosea kòrtiku. E vògt i restante di e bichinan morto den e trakto respiratorio, ta kouda tosamentu i tin par di biaha asta sanger ora e kachó ta tosa. Tambe bo por mira ku e kachó ta bira flaku.

E síntomanan ta:
– Debelidat;
– tosamentu króniko;
– lo bai kome tiki òf no ta kome;
– pèrdèmentu di peso;
– deshidratá;
– benout suave te gravemente;
– kai flou despues di un ehersisio intesamente òf eksitashon;
– vògt den barika(ascites);
– E patanan patras ta hincha (oedeem);
– E kabes òf e patanan dilanti ta hincha (Vena cava syndroom);
– morto inesperá.

Dianostiká bichi di kurason
Pa bo por dianostiká ku bo kachó tin bichi di kurason, bo tin ku hasi esaki serka bo veterinario. E por hasi esaki den 3 manera:

1. Analisá e sanger di e kachó:
E tèst aki bo kachó por hasi’é ora e tin mas ku 6 luna. Por pasa ku e veterinario ke ripití e tèst pa por ta mas siguir. Ta dependé ki metodo e veterinario ta huza.

2. Ekografia:
Dor di un eko, e veterinario por mira na e banda drechi di e kurason ku tin bichi di kurason.

3. Radiografia (òf X-ray):
E ardunan di e pulmon por tin un birá straño i e por ta será. Esaki por tin un indikashon pa un infarto na banda drechi di e kurason.

Tratamentu pa kachó ku tin bichi di kurason
Pa trata e bichi di kurason adulto ta algu hopi difísil, paso no ta un remedi anto ta kla. Ora bo ta eleminá e bichi di kurason adulto, mester tene kuenta pa e no ta bai sera partinan importante di ardu òf di e pulmon. Si esaki sosodé, e pashente por muri mesora. Ta pesei ta importante pa e kachó sosegá 30-40 dia despues di e tratamentu.

Pa trata e bichi di kurason, ta importante pa bo sigui e instrukshon di bo veterinario. Kada veterinario ta uza un método diferente.

Prevenshon di bichi di kurason
Pa prevení ku bo kachó ta haña bichi di kurason, prinsipalmente na un pais ku e riesgo ta haltu, ta rekomendá pa duna bo kachó remedi kontra di bichi di kurason. Esaki ta optenebel na tienda di animal òf na un veterinario. Si bo kachó tin 5-6 luna di bida, ta importante pa bo kuminsá ku e tratamentu aki mas lihé ku ta posíbel. Tene na kuenta ku e tratamentu aki ta pa henter e kachó su bida. Kòrda sigui e instrukshon di e enpake òf di bo veterinario.