Bichi di tripa i kurason

Den e promé siman nan di un yu’i kachó su bida, e no mester di remedi kontra di bichi pasombra esaki e ta risibí via di e lechi di e mama (solamente den kaso ku e mama a haña e remedi aki). Ora e yu’i kachó bai pasa su promé bakuna, e ta haña su promé remedi di bichi tambe (líkido). Mayoria biaha e remedi ta kontra ‘spoelworm’, ‘haakworm’ i ‘lintworm’. Puntra bo veterinario pa kua bichi e kachó ta protehá kontra di dje. Despues di kada bes ku bo bai ripití e bakuna, bo ta mira ku e kantidat di e remedi kontra di bichi ta oumentá. Esaki ta kana pareu ku e peso di e kachó.

Ta importante pa bo por sa kua bich e kachó ta protehá kontra dje. Paso bo kachó tin chèns di haña otro tipo di bichi (manera Giardia) tambe. Un veterinario por konstatá ki tipo di bichi e kachó tin pa despues por indika kua remedi presis bo por uza kontra di esaki.

Bo por haña remedi kontra di bichi pa kumpra den un Pèt shòp òf serka un veterinario. Ta hopi importante pa bo sa e kachó su peso. E remedi ta optenibel den forma di líkido òf tablèt. Si bo mes ta dunando bo kachó e remedi di bichi kaba, korda informá bo veterinario.

PUNTO IMPORTANTE!!!
Ta hopi importante pa bo trata bo kachó kontra di parásitonan. No ta solamente pa bo animal pero tambe pa protehá bo mes i bo famia kontra parásito ku por wòrdu transmití pa hende.

Remedi di bichi di kurason
Bo por kuminsá duna un yu’í kachó remedi di ‘bichi di kurason’ for di su di 2 bakuna (8 siman di bida). Tambe ta hopi importante pa bo sa kuantu bo kachó ta pisa. Tene na kuenta ku e remedi aki bo tin ku keda duna bo kachó 1 bes pa luna, durante henter su bida. Pasombra e parásito aki ta situa den sangura ku ta infektá.