Demodicose (Sarna di kachó chikí)

Demodex, yamá den boka di pueblo, sarna òf sarna di kachó chikí. Demodex ta un mijt ku semper ta biba riba kueru. Esaki ta nifiká, ku tur kachó tin demodex ta biba riba nan, pues esaki ta algu normal. Demodex ta biba den e saku di kabeinan (lananan) den un kantidat chikí. E kurpa tin un mekanismo di defensa for di nansementu ku ta regulá esaki nan.

E problema ta kuminsa serka bestia nan yòn ora e mekanismo di defensa no ta sufisiente desaroyá i e demodex nan aki ta bai multipliká. Serka bestia ku tin edat mas haltu, e multiplikashon di demodex por bini ora e mekanismo di defensa ta ménos dor di malesa òf uzo di sierto remedi. Tambe tin sierto rasa di kachó ku ta hopi sensibel pa demodicose, manera:
• West Highland White Terrier,
• Engelse Bulldog,
• Mopshond,
• Dobermann,
• Schotse Terriër,
• Bull Terriër
• Sharpei.

!!!Demodex NO ta kontagioso pa hende ni bestia!!!

Síntomanan
E síntomanan ta varia. Demodex ta kousa ku e lana nan ta kai. Bo ta mira ku tin kamindanan rondó i bashi na e kurpa di e animal. Komo ku e demodex ta multipliká, e sakunan di e lana nan ta wòrdu infektá ku bakteria. Dependé e seriedat di e infekshon di e kuero, esaki por empeorá te na un infekshon di kueru mas profundo. Tambe bo ta mira ku e kachó no tin lana na sierto kaminda, grawatashi, kaska i bultu kòrá.

Diagnóstiko
Pa diagnóstiká ku bo kachó tin demodex, un veterinario òf un dermatologo ta hasi un ‘afkrabsel’ i wak esaki bou di un mikroskop.

Tratamentu
Tin diferente manera ku por trata demodex. Esaki ta dependé di e seriedat problema di e situashon. Loke si ta importante ta pa no solamente trata e demodex, pero tambe e infekshon di bakteria. Esaki bo por haña un antibiotica, remedi òf un shampoo serka un veterinario.

Bo por haña ku tin kachó tin otro tip di tratamentu kontra di demodex. Esaki ta dependé di:
• E gravedat di e síntomanan
• Edat
• Rasa
• Si e kachó tin un malesa
Asina aki e veterinario por bisa kua tratamentu ta mas mihó pa bo kachó. Ta pesei tambe ta importante pa bo mantené e tratamentu sufisiente largu i pa e kueru wòrdu kontrolá pa e veterinario. Si bo stòp muchu trempan ku e tratamentu, esaki por kondusí ku e síntomanan ta bini bèk.

!!! TA HOPI IMPORTANTE PA SIGI E INSTRUKSHON DI BO VETERINARIO!!!

Perspektiva
Serka kachó yòn, e perspektiva ta mayoria biaha bon. Si e kachó tabata tin un tratamentu bon, tin chèns ku e problema nan no ta bini bèk. Pero e rasanan ya menshoná, por ta un tiki mas fèrfelu pa trata. Ounke e rasanan aki tabata tin un bon tratamentu, e por haña e mesun problemá ora e ta mas grandi. Serka un kachó di edat, mester wak kiko ta e kousa di e malesa aki ku e kachó a haña. Asina aki e rekuperashon lo bai hopi mas fásil.