Hondenziekte

Demper ta un vírus ku ta hopi kontagioso i peligroso pa kachónan (grandi i chikí) ku no a wórdu bakuná kontra di e vírus aki. Otro nòmber pa Distemper ta ‘Hondenziekte, Ziekte van Carré i Hard Pad Disease’. E vírus aki ta sintá den airu pero tambe por plama ora e kachó ta infektá via nister, tosamentu, via urina òf shushi.

Síntomanan di hondenziekte:

• wowo shushi;
• nanishi shushi;
• tosamentu;
• problema ku pulmon;
• diarea;
• e kachó no tin apetit;
• Tambe e kachó ta kuminsa haña problema neurologíko manera, paralisashon, epilepsia, problema ku ekilibrio i muskulónan ta bira swak.

Despues di 3 pa 6 dia ku e kachó kaba di wòrdu infectá, e keintura di e kachó ta subi. Esaki hopi be e doño no lo ripará. Despues di 1 pa 4 siman, bo ta kuminsá mira e síntomanan. E infekshon na selebre ta ehersé despues di 3 luna ku e kachó kuminsá demostrá síntomanan.

Prevenshon

E mihó manera pa prevení e malesa aki ta di bakuná bo kachó. Bo por hasi esaki for di ora e kachó tin 9 siman di bida. Ta hopi importante pa bo sigui e skema di bakuna ku bo veterinario ta rekomendá, pasombra kada veterinario ta traha otro. Puntra bo veterinario ki tipo di bakuna bo kachó a pasa. Si nunka bo kachó no a pasa e angua aki, tambe bo por bakuná, sí su salú ta bon. Si bo tin mas kachó na kas i un di nan tin e vírus aki, laga un veterinario kontrolá e otro nan tambe.

 Punto importante! Ora bo kachó ta bakuná kontra di e vírus aki, ta posíbel ku e por haña e malesa aki, pero su kurpa lo por bringa kontra di e vírus.

Tin bes e vírus ta asina avansá ku alfinal no por trata e kachó mas i tin ku poné drumi. Na Hulanda e vírus aki no ta frekuentá hopi, ta pasombra mayoria di e kachónan ta bakuná kontra di e vírus aki. Pero e riesgo ta hopi haltu na pais nan manera Kòrsòu, Bonairu i Aruba (otro paisnan tambe manera, Roemenië, Spaña, Brazil, etc.). 

Si bo ta pensa ku bo kachó tin hondenziekte e kacho tin ku bai den kuarantena. Kachónan ku tin síntomanan menor tambe por plama e vírus aki i forma un problema pa kachónan ku no ta bakuna. Ora e kachó ta bon di salú bèk, e kachó tin mag di keda 4 siman, despues e tin mag di sosialisá ku otro kachó. E vírus aki ta fasil pa kombatí den e area ku e kachó ta. Limpia i desefektá frekuentemente, huza awa kayente i tene e area seku por mata e vírus.

E vírus aki NO ta peligroso pa hende.