Kennelhoest

Kennelhoest ta un infekshon kontagioso di e trakto respiratorio (garganta, nanishi i trákea (luchtpijp)) ku ta wòrdu kousa dor di e virus ‘Parainfluenza’ i/òf e bakteria ‘Bordetella’. Kennelhoest bo por kompar’é ku ora un hende ta ferkout, pero e ta algu mas intenso i e ta dura mas largu. Un kachó ku ta infektá ku e malesa aki, por infektá kualke otro kachó, pero e ta tratabel i e kachó por rekuperá totalmente bèk for di dje. Ora un kachó ku ta infektá e por plama e malesa aki dor di nister, tosamentu, ora e ta blaf òf ora tin kontakto dirèkt ku nanishi i boka. E factornan ku tambe ta hunga un ròl ta e kantidat di kachó ku ta infektá, e wer, i e resistensia di e kachó.

Síntomanan di Kennelhoest:

Ora bo kachó ta infektá, e síntomanan ta bin den un periode kortiku (3-10 dia). E promé señal ta ku e kachó tin un tosá seku i duru, prinsipalmente ora e kachó ta agitá.

E síntomanan ta:

Tosá seku i duru (Ta manera e tin algu pegá den su garganta);
Sakamentu ku sleim;
Keintura;
Sùf;
E ta kome malu.

No ta tur kachó ta haña e síntomanan aki. Tin kachó ta no ta haña tosamentu. Uniko kos ku bo por mira ta ku nan nanishi ta sushi i su wowonan ta infektá. Pero engeneral e kachó no tin keintura i ta kome i bebe normal. Tin kaso ku e kachó ta bira asina malu, ku e ta haña keintura i pulmonia i despues fayesé.

Diagnóstiko di kennelhoest

E diagnóstiko ta wòrdu basá riba e síntomanan klíniko. Pa verifiká ku ta kennelhoest e kachó tin, mester hasi tèst na laboratorio dor di hasi ‘bacteriekweek’ òf un estudio di PCR. Motibu ku e malesa aki ta difísil pa diagnostiká ta pasombra e ta parse otro malesanan manera distemper, canine respiratoir corona virus, canine herpes, Mycoplasma spp. i Streptococcus zooepidemicus. Ta pesei un veterinario ta rekomendá pa hasi un tèst ( prinsipalmente serka yu di kachó).

Tratamentu di kennelhoest

E tratamentu ta konsistí di 2 pilá:

Kibra e sírkulo visioso;
Remedi.

Kibra e sírkulo visioso

Ora e garganta òf bo trákea ta iritá, e ta okashoná tosamentu. E tosamentu ta kondusí ku e trákea ta wòrdu iritá mas tantu kual ku ta okashona ku e tosamentu no ta stòp. Ta pesei ta importante pa bo kibra e sírkulo visioso aki dor di duna e kachó trankilidat i pa kambia su banchi di garganta pa un di kurpa.

Trankilidat

Si bo kachó eksitá ora e ta hunga òf ora e ta bai kana distansianan largu, e kachó ta bai hala rosea purá. E sleim di e garganta i e trákea ta bira seku kual ta bai kishiki e garganta. Asina aki e kachó ta bai tosa atrobe i e trákea ta keda iritá.

Kambia su banchi di garganta pa un di kurpa

Spesialmente serka kachónan ku ta gusta trèk ora nan ta kana, ta hopi importante pa bo kambia e banchi di garganta , pa un di kurpa. Esun di garganta lo bai primi riba e trákea ku ta kousa ku e kachó lo sigui tosa. E banchi di kurpa bo por keda huza despues tambe ora e kachó bira bon bèk. Esaki bo por kumpra na kualke tienda di animal òf serka un veterinario.

Remedi

Den prinsipio mayoria di e kachó no mester di niguin tratamentu i den un siman e kachó ta bira bon bèk. Tòg e kachó lo haña remedi pa evitá ku e kachó lo haña pulmonia. Un pulmonia ku ta hopi avansá ta difísil pa trata ku antibiotika.

Antibiotika

Serka un so veterinario e kachó por haña antibiotika pa kachó. E antibiotika aki ta traha mesun kos ora ora un hende tin ferkoud. No ta tur ora e kachó ta haña esaki.E veterinario por duna esaki ora ta papia di infekshon bakterial.

Stropi kontra tosamentu

E veterinario ta duna un stropi kontra di e tosamentu pa baha e tosamentu i pa duna e trákea trankilidat.

Prevenshon di kennelhoest

Pa prevenshon di kennelhoest ta hopi importante pa e area ta limpi i desinfektá i tin bon ventilashon. Kachónan ku ta nobo den grupo, mester wòrdu poné minimo 10 dia den kuarantena. Tambe por bakuná e kachó serka un veterinario. E kachó por wòrdu bakuna kontra di Parainfluenza i e bakteria Bordetella. Tin 2 tipo di bakuna kontra di kennelhoest. Unu ta bou di kueru i e otro ta den nanishi. Esun bou di kueru bo mester pasa 1 bes pa aña. E bakuna via nanishi ta pa solamente kontra di kennelhoest i ta traha mas lihé (den 3-5 dia) i ta duna un mihó protekshon na e garganta. E kachó por pasa e bakuna aki for di ora e ta puppy. Ora e kachó pasa e bakuna aki, e veterinario lo indiká den e buki di bakuna ki tipo di bakuna e kachó a haña i ki dia tin ku ripití e bakuna di kennelhoest. Ora bo kachó ta bai na un asilo, mayoria biaha e kompania ta pidi bo pa bo laga bo kachó pasa bakuna kontra kennelhoest. Hopi bes esaki ta un obligashon.

Punto importante! Un kachó ku ta bakuna kontra di kennelhoest por haña kennelhoest tòg. E bakuna no ta protegá e kachó pa no haña Kennelhoest, pero ta evitá ku e kachó no bira hopi malu.

Hende i pushi ku kennelhoest

Pa mayoria hende Kennelhoest no ta peligroso. Hendenan ku tin problema ku trakto respiratorio króniko òf tin un resistensia abou por bira malu di e bakteria Bordetella. En general pushi no ta sensibel di e malesa aki. Bordetella si por kousa ku e pushi por haña niesziekte òf pulmonia.