Komportashon di yu’i kachó

E promé fase kaminda e yu’i kachó ta sosialisá ta entre 3 pa 12 siman di bida. E fase aki ta esun mas importante den un bida di un yu’i kachó, pasombra durante e momentunan aki lo e bai eksperensha kosnan ku lo hasi un impakto grandi pa restu di su bida.

Kuriosidat
Den e temporada aki e yu’i kachónan ta kurioso i ke sera konosí i deskubrí tur loke e mira. Ta pesei ta importante pa nan tin kontakto ku hende i bestia.

Kustumbrá ku instentivo (prikkels)
Tin par di prikkels un yu’i kachó mester kustumbra kune manera zonido di auto òf aparatonan.
Esaki ta pa e kuminsá kustumbra ku e zonidonan i pa e no tin miedu di nan. Ta rekomendabel pa kuminsá poko poko ku e proseso pa e kachó rekonosé aparatonan pa e no haña demasiodo informashon den un tiru. Asina’ki lo bo por evitá komportashon indeseá. Lo ta rekomendabel pa bo tene e yu’i kacho den bo man den kuminsamentu. Asina bo por mira kon su reakshon ta riba sierto zonido, si e tin miedu òf e ta kurioso. Despues bo por pone abou i laga e mes bai diskubrí su ambiente. Si ainda e ta reaksoná ku miedu, ta importante pa bo no hasi kaso riba e reakshon aki dor di ignorá e koportashon. Si bo bai duna atenshon riba e ‘komportashon di miedu’, lo bo fortifiká e komportashon aki, kual ku bo no ke. Esaki ta hopi esensial pa su ‘entrenamentu’. Trese e kachó bèk na e opheto ku e kachó tin miedu despues di un par di siman. Despues di purba varios biaha, e kachó lo kustumá ku e prikkel i e prikkel lo no tin impakto negativo mas riba e kachó. 

Pusha i hunga
Lo bo bai mira e yu’i kachónan lo bai pusha i hunga ku otro. Esaki ta defení nan posishon den e neshi. E mama lo koregí nan si tin mester.

Hopi bes bo ta haña e kachó ku a kustumbra ku hende, pero e no a kustumbrá ku otro bestia. Laga e yu’i kachónan sera konosí ku otro kachónan ku e no konosé ainda , p.e. dor di lag’e bai un ‘puppykurso’. Esaki bo por hasi ora e kachó tin 8 siman i ta dura te ora e kachó tin 12 siman di bida. Asina aki e kachó por siña kon pa trata otro kachó. Na skol di kachó nan ta yama esaki ‘Puppy-Socialisatiebijeenkomsten’. Ta hopi importante pa bo huza e momentu aki, paso si e kachó tin mal eksperesia òf e no sosialisá manera mester ta, e por kuminsá morde di miedu.

Siña bo yu’i kachó pa pishi/ hasi shushi
Si bo ta kria bo kachó den kas ta importante pa bo siñ’é pa duna bo un señal si e tin ku bai hasi su nesesidatnan pafó. Esaki hopi be bo por mira ku e kachó ta bira intrankil. Ta imporante pa bo reakshona adekuá i pa bo bai mesora pafó ku e kachó.

Sigur den e promé lunanan ta importante pa bo bai pafó ku bo kachó mas biaha. Hasi esaki ora e kachó a kaba di lanta fo’i soño, despues di hunga i depues ku e la kaba di kome. Ora e hasi su nesesidat, bo por rekompensá e kachó manera bo ke (p.e. dune algu dushi). Si e kachó hasi su nenesidat paden, nunka no straf e, sino pone e kachó pafó.

Tep:
No laga e kachó kome òf bebe anochi laat si bo no mester lag’é bai pafó. Si bo no ta na kas, hinka e kachó den un bench. Kachó no gusta susha kaminda e ta drumi.

No laga e yu’i kachó subi riba kama ni riba banki
No laga e yu’i kachó subi kama drumi banda di bo ni riba banki. Paso un yu’i kachó tin ku siña for di trempan ku e tin ku ta abou di e rango i abo ta ariba. Si e órden di e rango no ta defení pa e kachó, lo bo haña problema di kòntròl despues.

Entrená bo kachó pa bishitá un veterinario
Ora bo tin un kachó ta importante pa kuminsá kustumbrá e kacho pa ora e tin ku bishitá un veterinario. Di e forma aki e lono eksperensha e bishita komo unu desagradabel. De bes enkuando bo por entrená bo kachó dor di lage sinta riba mesa, habri su boka, kontrolá den su orea, mishi ku su pia, etc. Hasi esaki semper den forma di wega. Ya komo bo a habri e kachó su boka, bo por entrená esaki pa kon pa‘skeiru su djente’ tambe. Esaki bo ta hasi dor di pone un gasa na bo dede i frega esaki na su djente i su karni di djente. Dia bo kachó bira adulto, ni abo ni e lo no tin un problema mas pa hasi esaki.

Kustumbrá pa kore den outo
Mesun kos ku un hende, un kachó por maria den outo. E síntomanan por ta sakamentu, halamentu di rosea lihé òf e ta bira intrankil. Mayoria bia ora e kachó bira grandi e ta kustumá ku esaki. Pa evitá ku e kachó no ta saka, duna e kachó tiki kuminda promé ku e sali kas. Si e kachó su stoma ta yen, e por saka mas lihé ku ora su stoma no ta yen òf un tiki yen. Sòru pa e kachó sinti’é komfortabel. Kore kamindanan kòrtiku kune, purba di distraí e kachó dor di pone muzik na volúmen abou i sòru pa no ta muchu kayente i ku tin bon ventilashon. 

NUNKA NO LAGA BO KACHÓ(NAN) SU SO DEN OUTO! NI PA UN RATU!!

Kustumbrá ku mucha
Manera a menshoná kaba ku e yu’i kachó mester kustumbrá ku hende i tambe otro bestianan. Aki tambe ta konta pa no fòrsá e komportashon na momentu ku  e kachó tin miedu. Bo por siña e yu’i kachó ku e no mester di tin miedu di hende ni otro bestia dor di hunga kune i dun’é algu di smak. Por ehèmpel ora bo tin un baby riba bo skochi, e kachó mester keda sinta banda di bo pia. Ora e hasi esaki bo por duna e kachó algu di smak. Ta hopi importante pa un kachó sosialisá ku mucha chikí. Asina e por siña ku e mucha tambe ta parti di famia. Nunka no laga e kachó su so huntu ku un mucha. Ni pa un ratu kòrtiku.