Kouchi di Konènchi

 xKonènchi ta bestianan ku ta biba den grupo. Ta pesei ta importante pa bo tene un konènchi den grupo. Si bo tin mas ku un konènchi, e kouchi mester ta sufisiente grandi pa nan 2 por move i para riba nan pia sin ningun problema. Un konènchi embra i un machu ta e mihó kombinashon. Si bo no ke pa e konènchinan prokreá, ta rekomendabel pa kastra e konènchi machu. Esaki bo por hasi serka un dòkter di bestia. 2 konènchi machu ku no ta kastrá, lo bai bringa ku otro ora nan bira grandi. Esaki tambe ta konta pa konènchi embra. Konènchi ku ta madurá, por kuminsá bringa ku otro dor di influensia di hormona. 2 konènchi embra òf 2 konènchi machu ku si ta kastrá, si por biba bon ku otro, prinsipalmente ora nan a lanta huntu for di chikí (den mesun un kouchi). Nunka no pone 2 konènchi ku ta deskonosí pa otro huntu, pasobra nan por bringa ku otro i lastimá otro hopi severo. Konènchi bo por kria paden i pafó di kas.

Konènchi den mondi
Konènchi ta bestianan hopi sosial. Den mondi nan ta biba den hòl di seru, ku nan mes a koba. Konènchi ta preferá di traha su hòl kaminda tin tera, riba un tereno ku tin seru i kaminda ku tin hopi mata i mondi pa asina nan por huza e hòl pa protekshon i pa warda kuminda. E hòl ta konsistí di un han prinsipal kaminda e konènchinan ta drenta i/òf sali, un han kaminda e yunan di konènchi ta keda i diferente han ku tin final. E entrada prinsipal no tin mata rondó di dje, pasobra esaki ta wòrdu frekuentemente huzá. E hannan di eskape, no ta wòrdu uza mashá. Mayoria biaha un konènchi no ta bai mas ku 100 meter leu for di su hòl. Pa ora tin peliger, e por kore drenta mesora den su hòl. Konènchi ta bestianan hopi limpi. Nan ta tene nan hòl limpi dor di hasi nan nesesidat pafó di nan hòl. Ora nan ta kome, semper nan ta alerto pa peliger ku ta aserká. Konènchi ta bestianan nokturno i nan ta mas aktivo den oranan mainta trempan.

Grandura di kouchi konènchi
E grandura di un kouchi di konènchi mester ta pas ku e grandura di e konènchi mes. E midinan aki ta sufisiente pa e konènchi por move, para riba nan 2 pianan i pa nan por traha un nèshi.

Grandura mínimo pa 1 konèchi (altura x profundidat x largura)
Rasa grandi (>5 kilo)       : 60 cm x 80 cm x 140 cm
Rasa mediano (3 – 5 kilo)  : 50 cm x 80 cm x 120 cm
Rasa chikí (1,5 – 3 kilo)    : 50 cm x 70 cm x 80 cm
Rasa enano (0,8 – 1,1 kilo) : 50 cm x 60 cm x 60 cm

Un kouchi di palu ta mas apropiá. Palu ta protehá e konènchi kontra kambio di temperatura i tambe bo por lak e kouchi. Tene na kuenta ku den fèrf tin produktonan venenoso pa konènchi. Eventualmente e konènchi lo bai kòu na e kouchi. Desbentaha di kouchi di palu ta ku e ta mas difísil pa limpia.

Kouchi paden
Konènchi ku ta biba paden, mester di un kouchi ku hopi espasio. Tambe e konènchi mester pasa un par di ora pafó di su kouchi. Konènchi ku ta henter dia den kouchi, no por desaroyá su múskulonan i ta bira gordo hopi mas lihé. Nan no por traha riba nan kondishon i ta desaroyá problema ku nan tripa. Si bo saka e konèchi for di su kouchi, nunka no lag’é su so. Parti di kas kaminda e konènchi ta yega mester hasi mas sigur ku ta posibel, dor di warda tur waya di koriente den un ‘kabel goot’. Tambe kita tur mata ku ta venenoso pa konènchi manera: ficus, dieffenbachia, dracaena, aloe vera, azalea, cyclamen i mata manera narcis i amaryllis. Esaki ta hopi importante, pasobra bo no por entrená un konènchi pa stòp di morde.

Grandura di un kouchi paden pa 2 konènchi enano, mester ta mínimo 80 x 150 (cm). Pa 2 konènchi chikí e grandura di e kouchi mester ta mínimo 80 x 200 (cm). Grandura di kouchi pa konènchi mediano bo ta kalkulá asina’ki: 0,3 m2 pa kada peso. Por ehèmpel: bo tin 2 konènchi ku ta pisa 4 kilo –> 2 x 0,3 x 4= 2,4 m2. E grandura di e kouchi ta bira mínimo 100 x 240 (cm). Pa konènchi mas ku 5 kilo bo ta kalkulá asina’ki: 0,25 pa kada kilo di e konènchi. Por ehèmpel: bo tin 2 konènchi ku ta pisa 7 kilo–> 2 x 0,25x 7= 3,5 m2. Grandura di e kouchi ta mínimo 100 x 350 (cm).

Hopi be ta difísil pa haña un kouchi di paden ku ta na midí i ku ta apropiá pa konènchi grandi. Solushon pa esaki ta pa pone un hèki ku ta pega na e kouchi. Asina’ki , e konènchi tin mas espasio pa e move. E hèkinan aki bo por kumpra na tienda di bestia i bo ta haña nan na diferente grandura. Un otro opshon ta pa kumpra e kouchi di hèki ku ta trahá pa kachó. Riba suela bo por pone linoli gròf òf un pida tapeit. Paga tino pa e konènchi no kou riba esaki.

Kouchi pafó
Si bo ke kria un konènchi pafó, bo mester sòru ku na e kouchi tin un kurá pegá na dje asina ku e konènchi por kis si e ke ta paden òf pafó. Un parti di e kouchi mester tin un lugá pa e konènchi por skonde pa bientu fuerte, awaseru i solo. Pone e kouchi di un manera ku ora awaseru kai, bientu ta supla duru òf solo ta kima, e konènchi por skonde .

Konènchi ta un bestia ku no por adaptá su mes bon ora e temperatura kambia. Ta pesei no ta rekomendabel pa kue un konènchi ku ta biba pafó, pone den kas ora ta hasi friu. Si bo ke pa un konènchi biba pafó, poné pafó den temporada ku ta mas kalor( yüni- yüli). Den temporada ku temperatura baha (novèmber- yanüari), e konènchi su lananan mes por adaptá na e temperatura. Sòru pa e korbertura di suela (hul.: bodemdekking) ta diki pa e konènchi por skonde bou di dje. Esaki ta yuda e konènchi tene su kurpa kayente.

E kurá ku ta pegá na e kouchi, mester ta konsistí un parti di mosaiko, yerba òf tera. E kurá mester ta mínimo 50 cm bou di tera pa evitá ku e konènchi por koba i skapa. Sòru tambe ku ningun depredadó (pushi òf para di rapiña (hul.: roofvogel) no por drenta den e kurá.

E grandura di e kochi ta dependé di grandura i kantidat di konènchi. Pa 2 konènchi enano i chikí, un grandura di 150 x 60x 60 (cm) mes ta bon i un kurá di 3 pa 4 m2; e konènchi mester por kore i kis unda e ke ta. Pa 2 konènchi grandi, e kouchi mester ta mínimo 200 x 80 x 80 (cm) i e kurá mester ta mínimo 5 m2.

Konènchi den kayente
Konènchi ta bestia ku no por biba den temperatura demasiado haltu. Esei ta nifiká ku nunka no laga e kouchi para den solo. For di un grado di 24, ya un konènchi tin problema ku e temperatura kaba.

Na kas mes bo por pone elementonan friu den e kouchi di e konènchi. Yena un bòter di plastik ku 2/3 di awa i hinka esaki den frizer. Ora esaki bira eis, lora esaki den un paña bieu, pa e konènchi no kima su mes na e bòter. Semper uza plèstik i no glas. Esaki por eksplotá. Asina aki e konènchi por drumi kantu di e bòternan.

Un otro manera pa fria un kouchi pafo ta, dor di pone un sèrbètè blanku i muhá riba e kouchi. E awa lo vaporá e kayente for di e kouchi.

No laga ningun bèrdura den e kouchi bentá. Esaki por putri i por trese muskita i otro bestianan indeseá. Ta pesei ta importante pa kontrolá e kouchi di konènchi. Muskita por pone asta webu riba e konènchi i kausa ku e konènchi ta haña bichi (hul.: myiasis). Lesa den kapítulo di parásito pa sa mas di myiasis.