Lana di konènchi

Si bo tin un konènchi ku lana kòrtiku, ta rekomendabel pa peña òf skeiru esaki regularmente den periodo ku nan lana ta kambia. E periodo ku e lana ta kambia ta dependé di e temperatura i largura di lus di dia. Pa aña un konènchi tin 4 periodo ku e lana ta kai. Den primavera i otoño e lana ta kai hopi i mei mei di e 2 temporadanan aki, e lana ta kai menos. Den temporada ku e lana ta kai menos, e konènchi no mester di nos ayudo. Den un par di siman, esaki mes ta stòp di kai.

Den temporada ku e lana ta kai hopi, e promé kapa di e lana ta laga lòs. Kaminda esaki a sosodé kaba, ya tin lana nobo ku a sali. E lana nobo nan aki mayoria bia tin un koló mas skur ku promé. Pa siman lo bo mira esaki. E ta kuminsá na su kabes –>pechu –>kurpa –>barika –>parti patras. Bo por rekonosé esaki dor ku e konènchi su lana tin 2 kapa di lana riba otro. Den e temporada aki, bo ta mira ku na e konènchi su orea tin kaminda ku ta bashí. Esaki ta algu normal den e temporada aki. Paso e lana di orea tambe ta kambia. E periodo aki por dura mas o menos 6 siman largu, pero ta dependé di e situashon ku e konènchi ta aden. Konènchi ku ta biba den kas, e periodo ku e lana ta kai hopi, por dura mas largu ku un konènchi ku ta biba pafó. Temperatura i lus di dia tambe hunga un ròl. Konènchi ku ta biba paden sa konfrontá ku e problema aki pa kasi henter aña largu i esaki bo por mira serka e konènchinan mas yòn tambe. E konènchi yòn ku ta biba pafó, ta kambia di lana 3 be pa aña.

Ki tipo di peña/skeiru bo por huza?
Bo por huza un skeiru di kabei fini, pero esaki lo no yuda pa kita e kapa di lana. Tambe bo ta haña skeiru di rùber. Esaki ta kita djis un par di lana. E manera ku bo tin ku peña ku e skeiru aki ta den moveshon di rònchi. Un peña ku djente di heru, tambe bo por huza. Pero tene na kuenta ku e kueru di un konènchi ta hopi delikado. Ta pesei nunka no ranka su lananan. Peña ku skeiru bo por kumpra den tienda di animal.

Manera a splika kaba, tin temporada ku konènchi ta kambia di lana. E lananan aki bo por kita ku man mes, pasobra ta kabei ku a lòs kaba.
Si bo tin un konènchi ku lana largu, bo tin ku peña/skeiru e konènchi 1 be pa siman. Esaki ta pa evitá ku e lana por sera na kònòpi. Ta rekomendabel pa kòrta e lananan 1 be pa siman. Huza un skèr ku tin punta rondó. Pa ayudo profeshonal bo por hiba bo konènchi serka un pelukero di animal.

Bon òf malu?:
Na un konènchi ku ta salú su lananan mester ta será/drumi riba otro i ta lombra. Tin diferente tipo di rasa di konènchi. Esaki por hasi un diferensha di tipo di lana. Serka konènchi ku lana largu manera ‘Angora’, mester peña e lananan 1 be pa siman. Si e konènchi tin kaminda riba su kueru ku ta bashí, e tin herida, (hopi) kaska òf/i e kueru ta kòrá, ta un indikashon ku e konènchi tin un problema.