Lintworm

Lintworm (Dipylidium Caninum) ta un otro tipo di endoparásito (parásito ku ta biba den kurpa) ku bo por haña serka kachó i pushi. Lintworm ta un bichi plat, koló blanku i ku ta konsist;i di un kabes i patras bo ta haña un kadena di segmento (proglottiden). Den kada un di e segmentonan aki ta yená ku mas o mènos 10.000 webu. Un lintworm ta dura 3 siman pa e bira adulto i e por tin un largura di 20 te ku 80 cm. Nan por biba mas ku 3 aña largu. E kabes ta gancha na e tripa di e anfritrion. Esaki su daño ta mínimo. Te ora e webunan den e segmeto parti patras hecha, e lintworm ta laga esaki lòs i e segemento aki ta gatia sali pafó di e ano di e animal. Anto esaki ta kishiki. Bo ta mira e animal ta kai sinta i ta skùif bai dilanti. Na hulandes nan ta yama esaki ‘sleetje rijden’. E ta musta prèt, pero aki ta un indikashon ku e animal ta infektá ku lintworm. E segmento ku a gatia bin pafó, bo por mira den shushi òf e ta pegá na e lana parti patras di e animal. Den boka di pueblo nan ta yam’é: bichi manera aros. Normalmente e animal no por bira malu di dje. Si e infekshon ta hopi avansá, e animal por haña doló di barika i diarea.

Pruga i lintworm

Mayoria biaha ora bo kachó tin lintworm, e chèns ta grandi ku e por tin pruga tambe. Pruga i pieu por kome e webunan di lintworm sin tin molester di dje. E larvanan ta forma un blas rondó di nan i ora e animal lembe e pruga òf e pieu aki, e lintworm por drenta den e sistema digestivo di e animal.

Karni kurú i lintworm

Un otro manera ku un lintworm por drente den e kurpa di e animal ta ora e kome un raton, djaka, konènchi òf karni/ organonan ku ta kurú. Tin diferente lintworm ku por drenta den un kurpa di un animal. Tin lintworm ku ta chikí (1,2 mm) i tin ku ta hopi largu ( te ku 5 meter). E segmento (proglottiden) aki no ta gatia bai pafó, pero ta sali ku e shushi bai pafó.

Tratamentu kontra di lintworm

Na un veterinario òf na un tienda di animal ta bende diferente remedi kontra di lintworm. Korda pa trata bo animal tambe kontra di pruga. Serka e lintworm Echinococcus, mester baña e animal tambe. Bisti un hanskun i un ‘mondkapje’.

Prevenshon di lintworm

Sòru pa bo animal ta protehá kontra di pruga i plaga (p.e. raton i djaka). Karni i oraganonan ku nos ta kome mester ta herebe òf mínimo 3 dia di vris (-20 °C). Tambe ta rekomendá pa si bo animal tin e lintworm Echinococcus, pa trata bo animal di kas kada 4-6 siman ku ontwoming.

Lintworm serka hende
Hende tambe por haña lintworm, spesialmente serka mucha. E tipo di lintworm ku bo ta haña serka hende ta mesun kos ku bo ta haña serka kachó i pushi. E síntomanan tambe ta mesun kos tambe. E hende ta haña grawatashi na su ano.

Hende por bin fayese si e wòrdu infektá ku e lintworm di soro (Echinococcus Multiloculars). Hopi hende por wòrdu infektá dor di kome fruta ku ta den mondi. Hende por wòrdu infekta tambe pa e lintworm (Dipylidium Caninum). Pero esaki no ta bini hopi dilanti. Pero protega bo kontra di e lintworm Echinococcus Multiloculars, ta rekomendabel pa bebe e remedi kontra di e lintworm tur luna. Lintworma ta bini den diferente parti di mundu manera: Asia, de sur du Sur-Amerika, Wèst di Canada, Alaska i den sur di Oustralia. Den Europa esaki ta bin den tur paisnan manera, Spaña, Portugal, Italia, Gresia, Turkia i Bulgaria. Solamente Islandia i Cyprus ta liber di Echinococcus Multiloculars.

Èkstra informashon di lintworm

E lintworm di mas chikí ta 1 mm i esun mas grandi ta 5 meter.
Lintworm ta huza otro bestianan pa nan yega na e anfritrion pa e lintworm sigui produsí. Ora e yega na e anfritrion aki, bo ta hañ’é den tripa. E anfritrion no tin masha molester di e lintworm.
Bo animal di kas, por wòrdu infektá dor di kome un anfritrion (manera: pruga, raton, konènchi, porko, baka, kabai etc.) ku ta kontené e larva di lintworm den blas. E larva ku ta warda den blas, ta mas peligroso ku ora e lintworm den tripa. E blas aki por bai sinta den múskulo, barika òf serebro. Korda hende tambe ta un di e anfritrion ku e larva ta bai sinta den blas.