E banchinan bo por haña nan na diferente koló i grandura. Skohé un banchi ku ta na midí di bo kachó. Tin dos diferente material di banchi ku bo por kumpra, nylon òf kueru. Tambe bo tin 2 tipo di banchi. Esun normal ku tur hende konosé (manera un faha) i esun ku na hulandés nan ta yama ‘tùigiù’ (tuigje). Tene na kuenta ku un pùpi ta krese hopi lihé i ku lo bo tin ku ahustá e banchi pa e no bira pèrtá na e garganta di e kachó. Pa kontrolá ku e banchi no ta muchu pèrtá na e kachó su garganta,  bo mester por pasa 2 pa 3 dede dor di e banchi na e garganta di e kachó  sin nuiguin problema.  E banchi no mester ta hopi lòs tampoko. Esei no ta e intenshon. E benefisio pa huza e tùigiù ta ku ora e kachó trèk, e tùigje no ta primi su garganta i stoba e kachó di hala rosea, pero e preshon ta riba su pechu. E desishon di e tipo di banchi kubo ta skohé ta keda na bo persona.

Si bo kachó ta mará, e liña mester ta minimo dos meter di largura i no mester pisa mas ku 300 gram pa meter. Kita tur obstakulo den kaminda pa evitá ku e liña ta pega. Kaminda e kachó ta mara, mester tin un kaminda ku e por skonde pa awa i solo. (Lesa mas aki tokante di bibienda)

Un kachó mester di un kaminda ku e ta sinti’e protehá i trankil. Pa e pùpi ku ta nobo, mester pone un pida paña òf ko’i hunga di e kachó mes. Ku esaki e ta sinti mas sigur. Nunka no straf un kachó anto mand’é bai kouchi/bènch. Esaki mester keda un kaminda ku e por sinti’e protehá.

Pèneng ta un plachi ku bo ta kologá na e kachó su banchi pa por identifiká bo kachó. Riba e pèneg bo ta pone e nòmber di e kachó i number di telefòn di abo kuta su doño. E benefisio di pèneng ta ku ora bo kachó pèrdè, e persona ku haña bo kachó, por identifik’é mesora. E desbentaga ta ku e pèneng por pèrdè.

E chep bo por haña solamente serka un veterinario. Informashon di prèis bo por yama i puntra bo dòkter di bestia. E bentaha di chep ta ku e kachó ta registrá na bo nòmber i e no ta pèrdè. Ku un mashin ku ta lesa chep, so bo por mira e number di chep i por identifiká di ken e kachó ta. Ora bo kachó pasa e chep, bo ta haña un papel ku bo informashon personal i e code di e chep. E code aki bo tin ku registré na  Super SAAS http://www.supersaas.nl/form/els-angels-kattenlodge/chipnummer_registratie. Warda e papel aki bon!

Si e kachó ta bin ku chip kaba i ba adoptá e kachó aki, ta rekomendabel pa kambia esaki.

Ora bo bin kas ku un kachó, e mester ta kome bròki kaba. Puntra e doño anterior kua kuminda e tabata duna e kachó pa bo por kontinuá ku esaki na kas. Si bo ke kambia e kuminda, pidi e doño anterior pa e duna bo un tiki di e kuminda pa bo duna e kachó en kombinashon ku esun nobo. No hasi esaki den un be pasombra e por kausa diarea. E stapnan ku bo tin ku sigui ta asina aki:

• Promé dia: ¼ di kuminda nobo i ¾ di e kuminda bieu (huntu)
• Di 2 dia: ½ di kuminda nobo i ½ di e kuminda bieu (huntu)
• Di 3 dia: ¾ di kuminda nobo i ¼ di e kuminda bieu (huntu)
• Di 4 dia: kuminda nobo.

Sigiendo e stap nan aki, bo por evitá ku bo kachó lo haña diarea i e por kuminsa kustuma ku e kuminda nobo ku bo ke dune.

Awendia riba merkado tin diferente kuminda ku bo por duna bo kachó. Pero tin be ta asina tantu bo no sa ta kua ta mas mihó pa bo kachó. Animal Eye su konoseho ta pa opservá kon bo kachó ta kome e kuminda i kon su kurpa ta reakshoná riba esaki. Bo por kumpra e kuminda mas karu, pero si bo kachó no ta gusté òf e kachó ta alérgiko na e kuminda, ta tantu bal (pa lesa mas tokante diferente kuminda pa kachó, klik aki).

Baki di bebe awa i di kome

Kumpra un baki di awa i di kome na e grandura di bo kachó. Na Kòrsòu ta hopi kayente. Sòru pa e kachó tin awa limpi i fresku tur dia. Si bo kachó ta bebe hopi awa, sóru pa esaki ta disponíbel. Promé ku bo duna bo kachó kuminda, djis laba esaki ku habón promé i hawa e baki bon. E kuminda por ta vèt i esaki por trese muskita. Muskita por trese malesa.

Unda ku bo bira bo por haña un luga ta bende kuki pa kachó. Bo tin diferente smaak, forma i grandura. Mesun kos ku ora bo ta kome hopi mangel, por subi di peso, ta konta pa kachó tambe. Esaki ta motibu ku mayoria biaha e kukinan tin hopi vèt òf suku den dje. Bo por duna bo kachó pero no hasi esaki komo su plato prinsipal. Tin hende ta trein nan kachó ku kuki. Si esaki ta e kaso, tin kaminda ta bende kuki nan ku menos kaloria den dje, p.e. di lamchi òf salmou.

Na Kòrsòu hopi kachó ta biba pafó i bo ta pensa ku e no mester di kusinchi òf sèrbète. Pero si un dia bo ke bañ’é, bo mester di sèrbètè. Sòru pa e kachó tin dje mes. Si e kachó ta biba den kas , sóru pa e tin un kusinchi. Asina ki e por evitá ku e ta drumi abòu riba un vlur ku ta friu.

Riba merkado tin diferente peña i skeiru pa kachó. Ta dependé e tipo di lana ku bo kachó tin. Bo tin kachó ku kabei largu, kòrtiku, di krul, kabei krus, kabei glad sin lana ‘zijdeachtig’ i kabei ku 2 dèk di lana ‘stokhaar’.  Pa kada un di e tipo di lana nan aki,  tin un skeiru spesial pe. Tambe kada tipo di lana tin diferente frekuensia ku bo tin ku skeiru/peña esaki. (pa lesa mas tokante tipo di lana di kachó, klek aki.)

Ta hopi importante pe skeiru bo kachó su djentenan 1 be pa siman. Esaki por evitá ku bo kachó ta haña problema ku buraku i boka di bo kachó ta hole stinki. Den un tienda di animal tin diferente skeiru di dje i pasta. Pa bo kachó kustumá ku esaki, ta importante pa bo kustum’é, dor di bai trankil i durante i despues di e proseso pa rekompensá e kachó.

Na un veterinario òf na un tienda di animal, ta bende diferente produkto kontra di parásito interno i eksterno. Esakinan ta bin den diferente forma. Pa parásito interno nos por pensa riba bichi di tripa i di kurason. Mayoria biaha e produktonan aki ta bin den forma di pulchi i likido. Pa parásito eksterno nos por pensa riba karpata òf pruga. Esaki nan ta bin diferente forma manera spuit, puiru, pulchi, banchi òf den shampú. Hopi imporante ta pa bo sa bo kachó su peso i edat. Tratamentu di bo kachó no ta solamente pa bo kachó, pero tambe pa protehá abo i bo famia.

Mesun kos ku abo tin un dòkter di kas, bo kachó tambe mester di un veterinario. Sòru pa bo tin tur informashon nesesario di bo veterinario. Bo veterinario lo ta un bon punto di informashon si bo tin un pregunta di bo kachó òf si tin un kaso di emergensia.