Material pa kouchi di konènchi

Ora ku bo ta kla ku e midí di e kouchi (paden òf pafó) pa e konènchi bo mester prepará e kouchi promé ku pone e konènchi aden. Materialnan nesesario:
1. Korbertura di suela
2. Dos baki di kuminda
3. Bòter pa bebe awa
4. Baki di higiena pesonal
5. Enrikesimentu 

1. Kobertura di suela (hul.: bodembedekking).
E kobertura di suela ta fungi pa absorbé orina, pa e konènchi drumi riba dje i pa tene e konènchi kayente den temporada ku e temperatura ta abou. Pa e promé kapa, bo por uza korant, pipita di grano, palu di krùl, pida di palu ku ta kòrtá chikí chikí, ‘hennepvezel’ òf kama di katuna. Sas tambe ta wòrdu uzá hopi, pero solamente ora e no ta stòf. E konènchi por haña problema ku pulmon. Riba e promé kapa, bo ta pone palu di grano òf un material di nèshi ku ta suave. E diferensia di kada un di e produktonan aki ta, ku unu ta apsorbé mihó ku e otro, kual ta mas higiéniko.

Sòru tambe ku e suela no ta duru. Si e suela ta duru e konènchi por habri su pia na herida ku konsekuensia di un infekshon (pododermatitis), prinsipalmente serka konènchi ku no tin hopi kabei, nan ta gordo i ta move tiki. Ta pesei ta importante pa tene e suela suave.

Punto di atenshon! Palu di grano i hoi no ta mesun kos. Hoi ta yerba seku i mayoria biaha e ta koló bèrdè. Hoi ta wòrdu huzá pa nutrishon. Palu di grano tin un struktura gròf i ta koló hel. Palu di grano ta wòrdu huza pa kobertura di suela. Esaki por wòrdu komé tambe, pero masha poko.

2. Dos baki di kuminda
Un konènchi mester di 2 baki di kuminda. Unu pa pone kuminda i e otro pa pone hoi den dje. Pa evitá ku e konènchi ta bòltu e baki di kuminda, ta rekomendabel pa kumpra unu ku ta pisá. Esaki bo por haña di keramik òf di piedra. Òf tin baki di kuminda ku bo por hak na e kouchi. Esakinan bo por kumpra na kualke tienda di bestia. E otro baki bo ta hinka hoi den dje. Esaki mester ta semper kologá. Si e hoi ta pone abou, mayoria biaha e konènchi lo no komé.

3. Bòter pa bebe awa
Bo por skohe pa pone un baki di serámika pa pone awa den dje, pero e konènchi lo yena e baki aki ku e kobertura di suela, kual ta chupa tur e awa. Ta pesei ta rekomendabel pa pone un bòter di awa. E bentaha di e bòternan aki ta, ku e awa no ta shusha. E desbentaha ta ku un pida di e kobertura di suela por pega den e punta kaminda e konènchi mester bebe awa. Esaki por laga e awa lèk, pero ta fásil pa kita esaki. Bebe na bòter no ta un manera natural ku un konènchi ta hasi. Ta pesei tin biaha e konènchi no ta komprondé e sistema di bebe aki. Esaki por tuma tempu. Si bo mira ku e awa a baha, ta nifiká ku e konènchi a komprondé unda e por haña awa. Si esaki no ta e kaso, djis mustra e konènchi unda e por haña awa. Duna bo konènchi tur dia awa fresku pa bebe.

4. Baki di higiena personal
Manera a bisa kaba, konènchi ta un bestia hopi limpi. Nan ta preferá di hasi nan nesesidat den un huki di kouchi ku nan a skohe. Ora bo konènchi skohe un huki, pone èkstra korant abou. Pa hasi e limpiesa mas fásil, bo por pone un baki pa e konènchi hasi su nesedidatnan. Den e baki bo ta pone un kapa di kobertura di suela manera, palu, kobertura di suela di pushi òf hennepvezel i ariba di dje bo ta pone palu di grano òf hoi. Pa entrená e konènchi pa e hasi su nesesidat den e baki, pone su shushi ku el a hasi den e baki bèk. Asina e konènchi sa ku ta den e baki ei e tin ku hasi su nesesidat.

Punto di atenshon! Nunka no pone un kobertura di suela di pushi ku ta forma klòmpi. Esaki por kousa konstipashon ora e konènchi kome. Sòru tambe pa e pipitanan  no ta skèrpi. Esaki por kòrta e pia di e konènchi.

5. Enrikesimentu
Pa kombertí e kouchi mas natural ku ta posíbel, pero tambe pa enrikesé komportashon natural di e konènchi, mester pone materialnan ku ta keda interesante pa e konènchi. Bo por yena e kouchi ku materialnan ku e konèchi por kou riba dje manera: palu, papel i/òf vegetashon. Bo por skonde e kos nan di kome bou di piedra, pòchi mata di bòltu òf pipa). Tambe bo por huza bala ku bèl den dje òf hoi den un bala. E interior di e kouchi bo por hasi’é mas interesante pa e konènchi dor di kambia e material nan di lugá òf pone material nobo.

Punto di atenshon! No duna bo konènchi kome un material ku no ta destiná pa kome. Si bo konènchi kou riba un material i esaki a bira skèrpi, kita esaki for di dje.