Nutrishon

Un yu’i kachó por kuminsá haña bròki pa ‘Puppy’ na momentu ku nan tin 5 pa 6 siman. Ta bon opshon pa sigui duna e yu’i kachó e mesun kuminda ku e tabata haña serka e doño anterior. Ora bo kambia e kachó su kuminda i dun’é un otro mesora, e por kousa diarea. Pa evitá esaki sigui e tip aki:

E promé dia: ¼ di e kuminda nobo i ¾ di e kuminda bieu
E di dos dia: ½ di e kuminda nobo i ½ di e kuminda bieu
E di tres dia: ¾ di e kuminda nobo i ¼ di e kuminda bieu
E di 4 dia: kuminda nobo kompletu.

E nutrishon serka yu di kachó di rasa chikí, mediano i rasa grandi ta diferente. Por ehèmpel, un Dashond (Tèckel) ta yega e edat di adulto den 8 pa 10 luna i un Sint Bernard ta yega e edat di un adulto den 24 luna. Un kuminda di bon kalidat ta sòru pa e kachó su shushi ta formá, e lana ta den bon kondishon i prinsipalmente pa e yu di kachó ta aktivo. Dor di no laga e yu di kachó bira muchu gordo, bo por evitá problema di sobrepeso i wesu. Den e periodo di kresementu serka kachónan rasa grandi, nan sa frekuentá problemanan di kresementu mas ku kachónan rasa chikí i mediano. E motibu di esaki ta ku kachónan di rasa grandi nan periodo di kresementu ta hopi mas largu.

Un kuminda desbalansá durante di e periodo di kresementu por trese problemanan inreversibel, espesialmente serka kachónan di rasanan grandi. Ta pesei ta importante pa e velosidat di kresementu no ta lihé. Si esaki ta e kaso e kachó por kore riesgonan manera problema ku peso òf/i ku wesu. I esaki por kondusí na mal formamentu di e skelèt. E velosidat di kresementu ta dependé di e kantidat di energia (kcal/kg) ku e kachó ta kome tur dia. Riba e paki di kuminda di e kachó tin pará kuantu e kachó tin mag di kome tur dia. No ta tur kachó ta mesun kos. Tin kachó mester di mas òf menos kantidat di kuminda pa dia.

Kuantu bes bo tin ku duna un yu’i kachó kuminda?
Te ku 3 luna di bida: 4 bes pa dia
Di 3 pa 6 luna: 3 bes pa dia
Despues di 6 luna: 2 bes pa dia

Kua ta e kualidatnan di un bon kuminda di kachó?
Kuminda ku ingrediente di kalidat haltu ku ta sòru pa menos shushi i e shushi ta formá.
Kuminda ku no ta kousa diarea.
E kuminda tin sabor.
E kuminda ta kumpli ku e energia (kcal/kg) ku e yu’i kachó mester di dje tur dia.
E kuminda tin un bon balanse di substansha nutritivo aden i ku ta kontrubí ku e renobashon di tehido pa kresementu.