Parvo

Parvo un vírus di kachó ku ta hopi kontagioso i e yama ‘Canine Parvo Virus’. Despues ku un kachó wòrdu kontagiá ku Parvo, den un par di dia e kachó ta bira malu. Tin kachó ta kuminsá mira síntomanan despues di 2 siman.

 Síntomanan di parvo ta:

• Diarea, mayoria biaha ku sanger den e shushi;
• Inaktivo;
• Muskuló ta bira suak ku e kachó no por para riba su pianan;
• Kentura;
• Su slijmvlies nan ta blanku
• Den sierto kaso, shòk.

E diarea por varia serka kada kachó. Tin kachó ta hañ’é suave i otro por hañ’é fuerte ku asta por kousa morto di e kachó. Komo ku e vírus ta ataká e selulanan blanku, e resistensia di e kachó ta baha kual ta eksponé e kachó pa otro tipo di vírus òf bakteria.

Un veterinario por konstatá si un kachó tin e vírus aki via su shushi. Hopi be na e síntomanan ya menshoná por konstatá ku e kachó tin parvo, pero tambe e holó partikuliar ku e kachó tin. Ta hopi importante pa bo tuma akshon mesora, pasombra e ta hopi kontagioso pa otro kachónan ku no ta kompletamente bakuná (no ta importá e edat di e kachó). Motibu ku parvo ta un vírus, no tin remedi pa trata parvo. Loke si por hasi ta trata e síntomanan.

E síntomanan por wòrdu tratá ku:

• Remedi kontra di sakamentu (serka un veterinario);
• E kachó lo haña vògt via infüs (serka un veterinario);
• Tranfushon di plasma (serka un veterinario);
• Lo bo tin ku bai fòrsa e kachó kome;
• Antibiotika (serka un veterinario). 

E chèns ku e kachó lo rekuperá ta dependé kon e malesa a avansá, e kondishon di e kachó i e kalidat di kuido ku e kachó ta haña. Un kachó bo por bakuná for di su 6 siman pa prevení e malesa aki.

Punto importante!!Tene na kuenta ku ora un kachó ta malu, e no ta wòrdu bakuná te ora e kachó ta den bon kondishon bèk.

Kon e Parvo ta plama?

Parvo ta plama via pupu i e saka di kachó. Un kachó por wòrdu kontagiá via un kachó ku ta malu, serka un kachó ku a kaba di kontagiá ku parvo òf un espasio ku ta kontiminá ku parvo. Hende tambe por plama e vírus sí e ta na su man òf na su paña. Parvo no ta un peliger pa hende. Si un kachó tabata eksponé pa Parvo, e kachó mester bai den kuarantena pa mínimo 2 siman. Despues di e tempu e kachó por sosialisá bèk ku otro kachó. Si un kachó ta malu, e ta obligatorio pa e kachó bai den kuarantena. Despues ku e kachó rekuperá, ta importante pa e kachó aki keda 2 siman mas den kuarantena, pasombra e chèns pa e Parvo plama tei ainda.

Promé ku bo ingresá e kachó den kumunidat bèk, ta importante ku bo por baña e kachó bon pa kita tur shushi foi su kurpa pa evitá ku tin e vírus ainda riba su lana. E vírus aki por sobrebibí den kamindanan ku ta sukú i humedo pa años. Ora bo ta bai trata un kachó ku ta den kuarantena, ta importante ku bo tin paña di protekshon i hanskun bistí.

Pa limpia e kuarantena, bo tin ku uza kloro òf halamid. Esaki ta e desefektante den forma di suptasia ku ta mata e vírus aki. Alkohòl i zür di amoniak NO ta un desefektante efektivo kontra di Parvo. Promé bo tin ku limpia e shushi, despues bo ta hasi un limpiasa profundo ku habon. Despues ku bo hawa i kita e habon, bo por huza e kloro (sigui e instrukshon riba e empake). Despues bo ta hawa kita e kloro (bo tin mag di ripiti esaki 2 be), e kuarantena ta kla pa kachó por huz’é bèk.

Si bo no por huza kloro, bo por huza kualke desinfektante (sigui e instrukshon di e empake) pa limpia e kuarantena. Esaki por kita un parti di e parvo.