Pruga

Pruga ta un parásito chikí, ku ta chupa sanger ku por trese hopi molester pa bo animal di kas i abo i bo famia.

Tin 8 diferente di pruga:

Ctenocephalides felis (pruga di pushi)
Ctenocephalides canis (pruga di kachó)
Pulex irritans (pruga di hende)
Spilopsyllus cuniculi (pruga di konènchi)
Xenopsylla cheopis (pruga di djaka)
Archaeopsyllus erinacei (pruga di ‘egel’)
Ceratophyullus gallineae (pruga di para)
Hystrichopsylla talpae ( pruga di bemòl).

Aperensia di un pruga di kachó

E pruga adulto ta 1-8 mm di largura i ta koló maron. Pruga ta parásitonan plat, pa ya asina nan por move fasilmente entre e kabei i e lananan. Pruga no tin hala, pero nan ta bula ku nan patanan largu. Asina aki nan por bula riba un anfritrion pa un otro anfritrion.

Siklo di bida di un pruga

E pruganan adulto ku bo ta haña riba bo kachó, ta solamente 5% di e populashon . Sobra ta den bo kas i/òf den bisendario. Pruga por pone 20-50 webu pa dia. Esei ta por lo ménos 2.000 webu den un bida di un pruga. E webu nan aki ta kai for di anfritrion i asina e webu ta bin den e bisendario di e anfritrion. 50% di e henter e populashon di pruga ta konsistí di webu. Despues di 2-4 dia e larva ta sali for di e webu. E larva nan ta bai skonde den un kaminda sukú i ta alimentá nan mes for di e shushi di e pruganan adulto. E larvanan por bai sinta den bo tapeit, den skref i den plent. E larvanan ta forma huntu 35% di e populashon di pruga. Despues di 2-3 siman e larva ta bira pòp. E pòp aki por keda asta 1½ aña na bida i ta protehá kontra diferente klima. Esaki ta nifiká ku ni ku stòfzùiger bo no por eliminánan. E pòp ta konsistí di 10% di e henter e populashon. Ora e pòp sinti vibrashon (p.e. un kachó kana pasa), e pruga ta sali for di pòp i bula mes ora riba e kachó. Esaki por pasa den 7 sekònde, kual den par di sekònde e ta kuminsa chupa sanger di e kachó. Den 48 ora e pruga a pone webu bèk. E siklo di bida di un pruga ta kompletá den 6 siman. E pruga, e webunan i e pupu bo por mira ku wowo. E webunan ta koló blanku. E pupu ta koló pretu.

Síntomanan di pruga riba kachó

Ora un pruga morde un kachó, e por kousa ku e kachó lo bai grawata hopi (por varia serka kada kachó). E skupi di e pruga ta kontené e enzima ‘histamine’ ku ta yuda e pruga chupa sanger. Tin kachó ta haña grawatashi solamente kaminda e pruga a morde i despues di un par di dia e ta pasa. Tin biaha e kueru ta hincha i e animal ta lo bai grawata i morde na e lana. Aki e lananan por kibra i e kachó ta bai ranka nan. Kaminda e pruga morde lo kue infekshon. Esaki bo por sinti’é i mira un bultu duru i kòrá riba e kueru. Esaki nos ta yama infekshon di kueru kousá pa pruga (vlooiendermatitis). Si e problema aki no wòrdu tratá e problema lo keda pa hopi largu i ku bo ta bai mira sitionan bashí riba e kueru di e kachó.

Alergiko pa mordé di pruga

Tin kachó ku henter nan sistema imune ta reakshoná, kaminda ta 1 kaminda 1 pruga a morde e animal. Esaki por duna hopi grawatashi ku por dura 6 siman largu. Aki nos ta papia ku e kachó ta alergiko pa e skupi di pruga. Hopi bes bo ta mira ku e kachó tin infekshon riba e kueru tambe. Den kaso aki, e tratamentu ta estriktamente entenso. Tur animal por bira alérgiko pa e skupi di pruga sí e kontakto ku pruga ta regular, pero tin animal ta mas sensibel ku otro. Si foi promé e animal wòrdu mordé di pruga i sistema mune reakshona riba e mordé aki, kada mordé di pruga, e animal lo keda haña e alergia aki. Ta pesei ta hopi importante pa bo tene bo kachó liber di pruga for di na e edat yòn.

Síntomanan di alergia pa pruga

Den promé instante e problema lo kuminsá patras di e kurpa pero den kaso nan mas grave, bo ta haña e alergia ta plama bai na kabes i pianan. Síntomanan ta:

Hopi grawatashi
Hot spots
Kaminda bashi ku kaska òf kueru di “olefante”.

Serka hende bo por haña mordé na man i na pia. Si un hende òf un bestia tin alergia pa pruga, e síntomanan lo ta mas fuerte, manera: grawatashi intensivo, e kueru lo reakshoná mas fuerte i ta okashoná infekshon sekundario.

Diagnostíko

Pa sa si bo animal tin pruga, bo por uza un peña di pruga. E pruga nan mes lo bo no mira mas, pero e peña ta fangu e pupu di e pruganan. Esaki bo por kita nan dor di pasa e peña riba un paña muhá. Loke bo ta mira ta ku e pupunan ta forma un koló korá di rustu.

Si un veterinario ta kere ku bo animal ta alergia di e mordé di pruga, e por hasi un tèst di kueru dor di spùit un kombinashon di e alergia di pruga i un antetidodo kontra de alergia di pruga den e kueru di e animal. Si easki hincha, ta nifiká bo animal ta positivo.

Si e resultado sali negativo, no ta nifiká ku e animal no ta alergiko di e morde di pruga.
Esaki ta nifiká ku e no a haña sufisiente antikurpa kontra e alergia. Loke por hasi ta pa trata henter e ambiente di e animal kontra pruga. Si e problema disparsé, ta nifiká ku e animal ta alergia kontra di mordé di pruga.

Tratamentu

E uniko tratamentu kontra di pruga ta pa tur bestia den i pafó di kas pero tambe paden i pafó di kas mester wòrdu kombatí kontra di pruga. Por dura 2 te ku 3 luna pa bo kuminsa mira resultado. Mientras tantu bo por bai bo veterianrio pa trata e animal kontra di infekshon i pa e hot spots.

Pa tratamentu di pruga riba e animal, den kas i den bibienda di e animal, tin diferente produkto ku bo por kumpra na un veterinario òf na un tienda di animal. Kòrda puntra ku e produkto kua estadia di e pruga e ta kombatí.

PUNTO IMPORTANTE!! Si bo animal tin pruga, e chèns ta hopi grandi ku e tin ‘bichi di sinta’ (Lintworm) tambe. Ta pesei ta rekomendabel pa duna e animal remidi di kontra di ‘lintworm’.