Pruga i mijter serka yu’i kachó

Pruga

E mama i e yunan di kachó por haña hopi molester di pruga. Tin biaha abo komo donõ di e kachó no ta mira e pruganan aki. Ora e pruganan bira demasiado, e por bira hopi peligroso pa e yu’i kachónan. E shushi di un pruga ta koló pretu. Si bo pasa un paña blanku muhá riba e kachó su kurpa, bo ta mira yen kos chikí koló kòrá esaki ta sanger den e shushi ku e pruga a bebe for di su anfitrion. 

Síntomanan

Síntomanan ku un kachó ku tin pruga ta:

• Grawatashi: Pruga ta un di e parásitonan ku ta morde duru. Esaki por kousá ku diripiente e animal ta bula. E pruga ta huza su skupi pa e sanger no kuaha. Esaki ta duna e animal grawatashi i iritashon i e animal ta bai grawata i morde kaminda e la wòrdu morde.
• Bichi: Pruga ta parásitonan ku por karga webu di ‘lintworm’. Si un animal kome un pruga ku ta infektá ku lintworm, e lintworm por krese bira adulto. Hende tambe por haña e lintworm aki.
• Allergia di pruga: Tin animal ta hopi sensibel pa e skupi di e pruga. Djis un par di mordé di e pruga, e animal a kuminsá haña reakshon di alergia. Esaki por kondusí ku e animal ta bai keda grawata i morde su kurpa te ora e habri su kurpa na herida. Tambe mordé bieu por aktivá bèk. 1 mordé pa siman ta sufisiente pa e proseso keda aktivo den e sistema di e animal.

Tratamentu kontra di pruga

Serka un veterinario òf na un Pèt shòpnan bo por haña produkto ku bo por huza pa e animal. Tene na kuenta ku tin produkto no ta mata e larva ni e webunan di e pruga. Ta importante pa bo puntra promé ku bo kumpra e produkto i kòrda sigui e instrukshon.

Peña di pruga

Ku yudansa di un peña kontra di pruga bo por kita e pruga adultu for di e animal. Huza e peña ku tin djente di heru i no esun di plèstik (no ta traha dje bon ei). Mayoria biaha bo ta mira e shushi di e pruga adulto riba e kachó. Esaki no ta nifiká ku e kachó no tin molester di pruga mas. Solamente 5% di e pruganan bo ta mira. Sobrá ta biba den kas òf den bisendario.

Tratamentu pa kas

Pa den kas tin diferente produkto ku bo por spùit kontra e pruga adulto i e larvanan. Aki tambe bo tin ku tene kuenta kua tipo di produkto bo ta huza i sigui e instrukshonnan.

PUNTO DI ATENSHON. PRUGA TA MORDE TUR ORA!!

Tin un ‘mito’  ku ta bisa ku e produktonan kontra di pruga ta traha asina lihé ku e pruga no tin chèns di morde. Esaki no ta bèrdat, pasombra pruga ta morde e anfrition mesora ora, ora e bula riba dje. Pa e motibu aki tambe ta hopi importante pa tuma akshon pa trata e kas i e bisendario di e animal. Esaki ta espesialmente serka animalnan ku tin alergia pa e mordé di pruga.