Na e momentu ku bo ke ingresá un kachó den bo famia, bo mester puntra bo mes na unda bo por adoptá un pùpi. Na Kòrsou tin diferente organisashon ku bo por hasi esaki. No solamente pùpi, pero tambe kachó nan grandi ku bo por duna e segundo chèns pa por tin un mihó bida. Un otro manera ta, ku bo por adoptá un kachó serka un konosí.

Un punto importante ta pa puntra bo mes dikon bo ke un kachó. Kisas ta pa wak bo kura òf pa djis un kompaño. Esaki ta importante pa bo analisá promé, paso esaki por dirigí bu pa bo skohé e rasa di e kachó i e tipo di karakter di e kachó ku ta mas adekuá pa abo. Na e momentu ku bo disidí ku bo ke un rasa di kachó, buska informashon di e rasa. Wak kon su karakter ta, kon grandi e por bira i e malesanan komun serka en tipo di rasa ei. Kòrda un kachó ta kosta tempu i sèn.

Siguiente paso ta pa wak na unda bo por haña e kachó aki i kuantu sèn e lo kosta. Na Kòrsou tin
diferente organisashon ku bo por adoptá un kachó. E benefisio di e organisashon nan aki ta ku mayoria biaha, e kachónan ta protehá kontra di bichi i melasa nan kontagioso. Si bo tin un konosí ku ta kria nan kachó bon, mayoria bia esaki nan tin un buki di angua ku e kachó a pasa. No wak na un kaminda so, sino wak na diferente luga promé ku bo adoptá un kachó.

Tep nan pa paga tino riba un nèshi di pùpi:

• Nunka no adoptá un pùpi menos ku 7 siman;
• Wowo i nanishi mester ta limpi i muhá;
• E karni di wowo i djente mester ta koló ros;
• E kachó su orea nan mester ta limpi;
• E kachó mester ta aktivo;
• E kachó su lananan no mester ta dòf;
• E kachó no mester ta flaku ku barika grandi (esaki ta un señal ku e por tin bichi);
• Wak e kondishon di e mama i e tata;
• Wak den ki estado e luga kaminda e kachó nan ta keda. Esaki mester ta limpi i no mester ta hole stinki;
• Puntra pa e buki di angua/paspoort.

Si tur e tep nan ariba menshoná ta na òrdu, pero tòg bo ta duda ku bo por kria un kachó, no tuma un kachó ainda. Tuma e desishon aki ora bo ta sinti bu ku bo ta kla pa kria un kachó.