Uña

Mantenshon di e uña di bo bestia doméstiko ta hopi importante. Uñanan demasiado largu, por okashoná doló na momentu di kana i e uña por kue infekshon.

Ki ora e uñanan ta demasiado largu?
E uñanan ta demasiado largu na momentu ku nan ta mishi na suela, e dede nan ta pará haltu i/òf e uñanan ta pará den banda. Largura di e uñanan ta ideal na momentu ku e uñanan ta nèt nèt un tiki promé ku jega suela, na moda ku e no ta mishi ku suela. Pa kòrta uña di un animal, ta rekomendabel pa no uza ko’i kòrta uña di hende. Serka un veterinario i/òf na un tienda di animal bo por kumpra ko’i kòrta uña spesialmente pa animal.

Kon pa kòrta uña?
Pa kòrta uña mester midi e largura ku bo tin ku kòrta dor di laga e kachó para riba su 4 patanan. Den uña di un animal tin un ardu ta kore. Nunka no kòrta muchu serka di e ardu, pasombra esaki por ta doloroso i okashona sangramentu. Si esaki pasa tòg, ta rekomendabel pa hinka e uña den puiru ‘kalkpoeder’.

Si bo animal su uña ta koló blanku, bo por mira e ardu koló ros. Pero si e uña ta koló pretu, ta difísil pa sá unda e ardu ta kore. Si bo ta muchu serka di e ardu, e bestia lo sinti esaki i lo trèk su pata bèk i asta e por grita. No ignorá e señal aki, paso esaki ta hasi hopi doló manera ya menshoná. Laga un hende yuda bo pa tene e animal pa ora bo ta bai kòrta e animal su uña. Si bo ta duda, laga un profeshonal den e sektor di animal pa hasi esaki.

Ora bo ta kla, semper rekomensá e kachó ku bo stèm òf algu dushi.